Sal Tlangval

Description

Zopui lal Thanglura khuangchawi ni zet chu a ropui kher mai, Zopui khua hi Lusei khaw dang hnaih lo taka awm a nih avangin a muan pawh an muang khat viau a, Sapui rawn tlak ve zeuh chang a awm tih loh phei hi chu leido leh buaina hi an nei ngai meuh lo,  Lal Thanglura hi a vanglai pawha pasalṭha khauh khaw dai ngul ni a khualthang pha ve ngat a ni bawk a, leido an nei ngai lo chung hian a tlangvalte pawh pasalṭha han thei fal em em awm lo mahse tawh khirh tak vek chu an ni awm e, a khuangchawi ni pawh hian nula, tlangvalte intihsiakna te neiin an hlim tlang hle, zan lamah pawh lal mualah an chai mup mup mai a, Zopui khuaah chuan hlim thawm lo chu hriat tur a awm lo a ni ber awm e, mahse hetih mek lai hian an hriat hauh lohin an khua aṭanga ni nga kal vela awm Khamrâng khua lal Suakdùla chuan a pasalṭha leh a tlangvalte Zopui run ram veka an thah bang chu sala kai vek tura tir chhuakin Zopui khaw dai lawkah an lo inkulh mup tawh a lo ni a, khaw chhunga an hlim thawm ngai thla chuan khawdaiah ralthuam chi kim nen an lo nghak ṭhup mai si, Zopui tlangvalte lah chuan chutiang thil engmah hre hek lo, an lal Khuangchawi niah chuan tlangval pawhin kal pai chha chha khawpin zu an lem ve tlat mai bawk nen an hma bak hi a duhawm fahran loh viau a ni. Zan lai arkhuan dawn thlenga an chai hnu chuan an ṭin ve ta hram a, tlangval ho pawh Zawlbuk an thleng fel chauh tihah an hnar zui chu a ni nghal deuh mai hlawm a, hun a liama khuan hmasa a rawn khuan tak al al ah chuan Lusei khaw nuam Zopui tan lungngaihna chhum dum chhah tak chuan a rawn zar hliah ṭan ta, Khamrâng pasalṭha leh tlangvalte chuan Zopui khawchhung chu lutin tlangval sawm ngain Zawlbuka tlangval mu hnar kuk kuk te chimih tur chuan an silaite chu zawlbuk bawhbelah an chhuang fur tawh mai, chutah le Khamrâng val upa Khambela chuan “Zopui tlangvalte u thawh in hai e, Khamrâng tlangval ten kan thawh khalh che u a nia” tih pahin a thing bung ken chuan Zawlbuk chhuat chu an deng dawt a, mahse tumah an harh ta tlat lo, val upa Khambela chuan “kap rawh u” an ti nghal tuarh a, Zopui tlangval muhil lai an han kah chilh ta tak tak mai chu an mut hmunah an eu awrh awrh ringawt tawh mai a ni, silai thawma rawn harh te lah chu feiin an khawh thlu nghal tawp tawp mai bawk si, kar lovah Zopui zawlbuka tlangval ho chu nunna nei reng an awm ta lo, khua lah chu alh sen zuai zuai tawh mai bawk si, Khamrâng tlangvalte chu an che na kher mai, naupang an ni emaw, hmeichhia leh tar thleng chuan tumah dim reng an nei lo, an hmuh apiang chu an vai thal tawp tawp mai a ni.